Kryeministri i Kosovës, Albin Kurti, ka zhvilluar një takim me disa personalitete franceze që ndër vite kanë kontribuar në mbështetjen e Kosovës dhe në promovimin e shtetit, kulturës dhe historisë së saj.
Takimi u mbajt para nisjes zyrtare të Forumit të Paqes në Paris, ku pjesëmarrës ishin ish-ministri francez i Mbrojtjes, Alain Richard, oficeri dhe ish-zyrtari i Ministrisë së Mbrojtjes, Gilles Pernet, antropologia dhe studiuesja Véronique Nahoum-Grappe, drejtoresha e Qendrës Kulturore të Kosovës në Paris, Frédérique Duversin, si dhe gazetarja dhe ish-korrespondentja e gazetës Le Monde, Florence Hartmann.
Gjatë takimit, Kurti dhe të pranishmit diskutuan për zhvillimet politike dhe ekonomike në Kosovë, përparimin demokratik, investimet në siguri dhe mbrojtje, si dhe proceset që lidhen me drejtësinë ndërkombëtare.
Përmes një deklarate, kryeministri Kurti bëri të ditur se një nga temat e diskutimit ishte edhe aktgjykimi i 16 shtatorit dhe angazhimi për korrigjimin e tij në procedurën e apelit.
“Biseduam për përparimin demokratik dhe zhvillimin e qëndrueshëm e të vazhdueshëm ekonomik, për investimet në siguri e në mbrojtje, për aktgjykimin e padrejtë të 16 shtatorit dhe angazhimin për korrigjimin e tij në apel”, deklaroi Kurti.
Ai gjithashtu prezantoi planet e Qeverisë për mandatin e ri qeverisës, duke theksuar rëndësinë e rolit të Francës në procesin e integrimit euro-atlantik të Republikës së Kosovës.
Personalitetet e pranishme kanë pasur angazhim të ndryshëm ndër vite në çështjen e Kosovës, përfshirë mbështetjen gjatë luftës së vitit 1999, hulumtimet mbi historinë dhe pasojat e luftës, si dhe promovimin e kulturës dhe artit kosovar në Francë.
