Kosova planifikon të ndajë 224 milionë e 168 mijë e 705 euro për mbrojtjen në vitin 2027, duke shënuar buxhetin më të lartë në historinë e Ministrisë së Mbrojtjes dhe Ushtrisë së Kosovës, përcjell albinfo.ch.
Këtë e ka bërë të ditur ministri i Mbrojtjes, Ejup Maqedonci, përmes një publikimi, ku ka prezantuar planifikimin buxhetor për vitin e ardhshëm.
Sipas Maqedoncit, përmes këtij buxheti do të vazhdojnë investimet në modernizimin e Forcës së Sigurisë së Kosovës, furnizimin me pajisje dhe sisteme moderne ushtarake, si dhe në ngritjen e kapaciteteve operacionale.
Një tjetër fushë ku parashihet të investohet është zhvillimi i infrastrukturës mbrojtëse, me synimin për të avancuar më tej kapacitetet e sigurisë dhe mbrojtjes së vendit.
Shuma prej mbi 224 milionë eurosh përfaqëson planifikimin më të lartë buxhetor për mbrojtjen që nga themelimi i Ministrisë së Mbrojtjes dhe zhvillimi i Ushtrisë së Kosovës./Albinfo.ch
