Panairi, i cili organizohet nga Rrjeti i Bizneseve Shqiptare në Austri, pritet të jetë pikëtakimi i qindra bizneseve nga trojet shqiptare dhe vendet evropiane, njofton albinfo.at.
Panairi ka për qëllim të të krijojë mundësi të reja të bashkëpunimit ekonomik, promovimin e produkteve dhe shërbimeve, si dhe zgjerimin e rrjeteve dhe kontakteve ndërmjet bizneseve.
Gjatë kësaj dite, prezantohen bizneset e suksesshme shqiptare që veprojnë në Austri nga të gjitha fushat: ndërtimtari, arkitekturë, gastronomi, turizëm, IT, media, estetikë, automobilizëm etj. Në panair, edhe këtë vit, nuk do të mungojnë me pjesëmarrje as kompani të ndryshme nga Kosova, Shqipëria, Lugina e Preshevës, Mali i Zi si dhe nga vende të tjera evropiane.
Yll Blakaj, kryetar i Rrjetit të Bizneseve Shqiptare në Austri, ka ftuar kompanitë biznesore që të bëhën pjesë e këtij panairi, duke theksuar rëndësinë e tij në krijimin e bashkëpunimeve të reja, zgjerimin e rrjeteve të biznesit dhe promovimin e kompanive shqiptare në tregun ndërkombëtar.” Ky është viti i 6-shtë që ne e organizojmë këtë panair dhe tashmë bizneset e kanë kuptuar edhe rëndësinë e këtij panairi prandaj këtë vit presim që të kemi edhe më shumë pjesëmarrës si nga vendlindja ashtu edhe nga vende të tjera evropiane”, ka thënë Blakaj teksa ka shtuar: “Është bërë një traditë e mirë e bashkëpunimit mes bizneseve nga diaspora dhe bizneseve nga viset shqiptare, prandaj presim një pjesëmarrje masive edhe këtë vit”, i cili ndër te tjera potencoi se rezultatet e deritashme janë të kënaqshme por jo edhe aq sa është synimi i këtij rrjeti.
Gjatë panairit, bizneset e shqiptarëve shpërndajnë falas për vizitorët: vizitkarta, shkrepsa e stilolapsa të ndryshëm.
Hyrja për vizitorë është falas.
Sipas njoftimit nga organizatorët, pas përfundimit të panairit, për kompanitë pjesëmarrëse do të shtrohet një darkë solemne për nder të festës së 28 Nëntorit, Ditës së Flamurit,
Panairi i Bizneseve Shqiptare në Austri është njëri prej eventeve kryesore që organizohet nga Rrjeti i Bizneseve.
