Kryeministri i Kosovës, Albin Kurti, është pritur në takim nga Presidenti i Francës, Emmanuel Macron, në Pallatin Élysée në Paris.
Gjatë takimit, Kurti ka vlerësuar rolin e Francës si një aleate dhe partnere të rëndësishme të Kosovës, duke theksuar mbështetjen franceze që nga periudha e luftës për çlirim dhe pavarësi.
Sipas Kurtit, në takim është diskutuar për mundësitë e reja të bashkëpunimit ndërmjet dy vendeve, integrimin euroatlantik të Kosovës dhe çështjet e sigurisë në rajon.
Kreu i Qeverisë ka theksuar gjithashtu rëndësinë e mbështetjes së Francës për avancimin e Kosovës drejt Bashkimit Evropian, veçanërisht për marrjen e statusit të vendit kandidat dhe hapjen e negociatave për anëtarësim.
Një tjetër temë e diskutimit ishte iniciativa e presidentit Macron për mbrojtjen e fëmijëve nga rreziqet që lidhen me përdorimin në rritje të teknologjisë. Kjo çështje ishte në fokus të Forumit të Paqes në Paris, ku Kosova iu bashkua Deklaratës Politike të Samitit të Fëmijëve, që synon mbrojtjen e mirëqenies, të drejtave dhe së ardhmes së brezave të rinj.
Në përfundim, Kurti ka theksuar se Kosova dhe Franca do të vazhdojnë bashkëpunimin në funksion të paqes, zhvillimit ekonomik dhe perspektivës së përbashkët evropiane.
