Vlera Halimi Fazlija, profesoreshë me prejardhje nga Presheva, ka shënuar një tjetër sukses në karrierën e saj akademike dhe profesionale në Shtetet e Bashkuara të Amerikës, transmeton albinfo.ch.
Ajo është zgjedhur sekretare e Seksionit të Shëndetit Oral (Oral Health Section) në Asociacionin Amerikan të Shëndetit Publik (APHA), një nga organizatat e rëndësishme profesionale në fushën e shëndetit publik në SHBA.
Lajmin e ka bërë të ditur vetë Fazlija përmes një publikimi në rrjetet sociale, ku ka ndarë edhe përvojën e saj nga pjesëmarrja në konferencën vjetore të APHA 2026, e mbajtur në San Antonio të Teksasit.
Gjatë konferencës, ajo prezantoi punën e saj kërkimore dhe shkëmbeu përvoja me profesionistë të shëndetit publik, duke diskutuar tema që lidhen me barazinë në shëndetësi, drejtësinë sociale dhe avancimin e shëndetit oral.
Fazlija u shpreh se ndihet e nderuar për besimin e marrë dhe se pret të kontribuojë në misionin e organizatës për avancimin e barazisë në shëndetin oral dhe mbështetjen e politikave të shëndetit publik.
Ajo theksoi gjithashtu se njohuritë dhe përvojat e fituara gjatë kësaj konference do t’i ndajë me studentët dhe kolegët e saj, duke i shfrytëzuar për të pasuruar procesin mësimor, kërkimin shkencor dhe praktikën profesionale.
Zgjedhja në këtë pozitë përbën një tjetër arritje në rrugëtimin profesional të Vlera Halimi Fazlijës, duke e bërë atë një emër përfaqësues të komunitetit shqiptar në fushën e shkencës dhe shëndetit publik në SHBA./Albinfo.ch
