Argjira Veseli ka shënuar një arritje të rëndësishme në rrugëtimin e saj akademik, duke përfunduar me sukses doktoraturën në Universitetin e Zagrebit, në Kroaci, ku është vlerësuar me titullin Magna Cum Laude, që nënkupton rezultate me nderime të larta akademike, shkruan albinfo.ch.
Lajmin e ka bërë të ditur vetë Veseli, e cila përmes një publikimi ka ndarë emocionet dhe mirënjohjen për përmbylljen e këtij rrugëtimi.
Në këtë proces akademik, ajo ka veçuar kontributin e mentorëve të saj, Prof. Dr. Ivana Čuković-Bagić dhe Prof. Dr. Lul Raka, për udhëzimet, mbështetjen dhe besimin gjatë gjithë periudhës së studimeve.
Veseli ka shprehur mirënjohje të veçantë edhe për familjen, duke theksuar rëndësinë e dashurisë dhe përkrahjes së vazhdueshme që ka marrë gjatë këtij rrugëtimi.
Për të, kjo arritje përfaqëson shumë më tepër sesa një diplomë apo titull akademik. Ajo e sheh si rezultat të përvojave, sfidave të tejkaluara, njohurive të fituara dhe njerëzve që kanë qenë pjesë e këtij procesi.
Një vend të veçantë në dedikimin e saj zënë fëmijët, Froni dhe Bora, të cilëve ua ka kushtuar këtë sukses, duke i cilësuar si motivimin dhe arsyen e këtij rrugëtimi.
“Duke parë prapa, kuptoj se kjo arritje ka të bëjë me shumë më tepër se një titull ose një diplomë. Bëhet fjalë për njerëzit që takoni, sfidat që kapërceni, mësimet që merrni dhe, në fund, personin që bëheni gjatë rrugës”, ka shkruar Veseli.
Përfundimi i doktoraturës me vlerësimin Magna Cum Laude në Universitetin e Zagrebit shënon një etapë të rëndësishme në zhvillimin e saj akademik dhe profesional./Albinfo.ch
