Zyrtarët e Sektorit të Antikontrabandës të Doganës së Kosovës kanë zbuluar 150 mijë euro të padeklaruara gjatë kontrollit të një veture në Pikëkalimin Kufitar të Vërmicës, përcjell albinfo.ch.
Sipas komunikatës së Doganës, rasti ka ndodhur më 12 nëntor, rreth orës 19:00, në hyrje të Kosovës. Drejtuesi i veturës fillimisht u kishte thënë zyrtarëve doganorë se nuk kishte asgjë për të deklaruar.
Gjatë kontrollit të detajuar janë gjetur mjetet monetare. Drejtuesi më pas ka deklaruar se shuma ishte 120 mijë euro, por numërimi ka treguar se bëhej fjalë për 150 mijë euro, të gjitha në kartëmonedha prej 50 eurosh.
Për mosdeklarim janë konfiskuar 37.500 euro, që përbëjnë 25 për qind të shumës. Pjesa tjetër, prej 112.500 eurosh, është mbajtur për deponim dhe ruajtje deri në përfundimin e procedurave përkatëse.
Rasti është trajtuar nga Sektori i Hetimeve i Doganës, në koordinim me Prokurorinë kompetente në Prizren. Me udhëzim të prokurorit kujdestar, drejtuesi dhe vetura janë liruar, ndërsa personi është obliguar të paraqesë dokumentacion që dëshmon prejardhjen e parave.
Dogana rikujton se udhëtarët kanë detyrim ligjor të deklarojnë mjete monetare në vlerë prej 10 mijë eurosh ose më shumë gjatë hyrjes apo daljes nga Kosova./Albinfo.ch
