Kryeministri i Kosovës, Albin Kurti, ka zhvilluar një takim me kryeministrin e Mbretërisë së Bashkuar, Andy Burnham, në kuadër të qëndrimit të tij në Dublin, ku po mbahet samiti i Komunitetit Politik Evropian (EPC), transmeton albinfo.ch.
Lajmin e ka bërë të ditur vetë Kurti përmes një postimi në Facebook, ku ka vlerësuar marrëdhëniet ndërmjet Kosovës dhe Mbretërisë së Bashkuar, duke e cilësuar këtë të fundit si partnere dhe aleate të posaçme të Republikës së Kosovës.
Ai ka shprehur mirënjohje për mbështetjen e palëkundur dhe të vazhdueshme britanike, ndërsa ka theksuar se Kosova synon thellimin e mëtejshëm të marrëdhënieve dypalëshe dhe zgjerimin e bashkëpunimit.
“Mbretëria e Bashkuar është partnere dhe aleate e posaçme e Republikës së Kosovës. Jemi mirënjohës e falënderues për mbështetjen e palëkundur dhe të vazhdueshme të saj, teksa synojmë e angazhohemi për thellimin e marrëdhënieve dhe zgjerimin e bashkëpunimit”, ka shkruar Kurti.
Takimi u zhvillua në përmbyllje të punimeve të samitit të Komunitetit Politik Evropian në Dublin, ku Kurti ka zhvilluar edhe takime të tjera me përfaqësues të shteteve dhe institucioneve ndërkombëtare./Albinfo.ch
