Kosova po prezanton potencialin e saj turistik në panairin ndërkombëtar Travel News Market 2026, i cili po mbahet në Stokholm të Suedisë, transmeton albinfo.ch.
Në këtë panair po marrin pjesë dhjetë kompani turistike nga Kosova, të cilat po prezantojnë destinacionet, atraksionet dhe përvojat e ndryshme që vendi ofron për turistët ndërkombëtarë.
Pjesëmarrja në këtë ngjarje synon krijimin e kontakteve të reja dhe zhvillimin e bashkëpunimit me operatorë turistikë dhe agjenci udhëtimi nga vendet nordike, përmes takimeve biznesore dhe shkëmbimit të përvojave.
Në kuadër të promovimit të Kosovës është edhe alpinistja Uta Ibrahimi, e cila përmes përvojave të saj në eksplorimin e natyrës dhe udhëtimeve promovon mundësitë që vendi ofron për turizmin e aventurës.
Pjesëmarrja e Kosovës në këtë panair organizohet nga Ministria e Kulturës dhe Turizmit, në bashkëpunim me projektin GROW, të mbështetur nga Sida dhe të zbatuar nga Swisscontact, si dhe në koordinim me Ambasadën e Kosovës në Suedi.
Përmes kësaj pjesëmarrjeje, synohet rritja e prezencës së Kosovës në tregjet nordike dhe krijimi i mundësive të reja për bizneset turistike vendore në tregun ndërkombëtar./Albinfo.ch
