Kryqe nazistë në afërsi të qendrës së azilit

Policia Kantonale mendon se shkak për këtë akcion ilegal është hapja e një qendre për strehimin e azilkërkuesve në këtë lokalitet

Persona të panjohur kanë shkruar në natën në mes të të dielës dhe të hënës parulla me përmbajtje kundër të huajve dhe kanë vizatuar kryqe të thyer në rrugët dhe në shenjat e komunikacionit në Sulgen të kantonit Thurgau.

Policia Kantonale mendon se shkak për këtë akcion ilegal është hapja e një qendre për strehimin e azilkërkuesve në këtë lokalitet, shkruan thurgauerzeitung.ch. Vizatimet janë bërë në afërsi të qendrës për mbrojtje civile, (bunker) ku është vendosur nga qeveria e vendit strehimi i 120 azilkërkuesve. Sipas deklaratës së një zëdhënësi të SEM (Sekretariati Federal për Migracion), në këtë strehimore fillimisht janë vendosur 24 persona, të gjithë meshkuj si dhe personeli.

Vizatimet janë mënjanuar menjëherë ndërsa komuna ka bërë padi kundër personit të panjohur, thotë një zëdhënës policie. Policia është në kërkim të dëshmitarëve.