Interpretimi i këngës nacionaliste serbe “Oj Kosovo, Kosovo” në hapje të Forumit të Zgjerimit të Bashkimit Evropian në Bruksel ka nxitur reagime nga përfaqësues politikë të Kosovës dhe deputetë të Parlamentit Evropian.
Reagimet kanë ardhur për shkak se kënga, e cila përmban pretendime territoriale ndaj Kosovës dhe mohon shtetësinë e saj, është interpretuar në një aktivitet zyrtar të organizuar nga Komisioni Evropian, kushtuar zgjerimit të BE-së dhe marrëdhënieve ndërmjet vendeve.
Raportuesi për Kosovën në Parlamentin Evropian, Riho Terras, e ka cilësuar këtë veprim si provokim të mundshëm të qëllimshëm ose si mungesë të plotë të njohurive për përmbajtjen dhe domethënien e këngës. “Ose një provokim i qëllimshëm, ose padijeni e plotë. Interpretimi i një kënge nacionaliste serbe që shfaq pretendime territoriale mbi Kosovën në një ngjarje të zgjerimit të BE-së është një gafë jashtëzakonisht e pandjeshme dhe pa shije.” – ka shkruar Terras në platformën X.
Reagim ka pasur edhe nga Jeton Zulfaj, kryenegociator i Kosovës me Bashkimin Evropian, i cili ka vënë në pikëpyetje përfshirjen e kësaj kënge në një aktivitet të BE-së, ndërsa ka kërkuar sqarime nga komisionerja për Zgjerim, Marta Kos.Zulfaj ka theksuar se kënga është shkruar në kohën kur regjimi i Slobodan Millosheviqit po shfuqizonte autonominë e Kosovës dhe po shtypte popullin shqiptar. “Një këngë nacionaliste serbe, që mohon shtetësinë e Kosovës dhe që u shkrua në kohën kur kasapi i Ballkanit, Millosheviqi, po i shfuqizonte të drejtat e Kosovës dhe po e shtypte popullin tonë, u interpretua në hapje të Forumit të Zgjerimit të BE-së. Kjo është skandaloze e papranueshme. Një aktivitet i BE-së për zgjerimin nuk mund t’i japë skenë nacionalizmit serb.”- ka shkruar Zulfaj në platformën X.
Ai ka kërkuar që komisionerja Kos të shpjegojë se si është lejuar interpretimi i kësaj kënge dhe çfarë masash do të ndërmerren. Zulfaj ka ngritur gjithashtu çështjen e mospërfshirjes së Kosovës në këtë forum, duke e cilësuar vendin si përparuesin më të madh demokratik në Ballkanin Perëndimor gjatë dekadës së fundit dhe të harmonizuar plotësisht me politikën e jashtme dhe vlerat e BE-së, transmeton albinfo.ch.
Agron Bajrami, kryenegociator për dialogun Kosovë-Serbi, ka reaguar ndaj interpretimit të këngës, duke thënë se kjo nuk mund të konsiderohet shkëmbim kulturor, pasi përmbajtja e saj promovon pretendime politike mbi territorin e Kosovës. “Në koncertin e hapjes së Forumit të Zgjerimit të BE-së në Bruksel, të organizuar nga Komisioni Evropian nën drejtimin e komisioneres Marta Kos, u interpretua kënga nacionaliste serbe ‘Oj Kosovo, Kosovo’. Ky nuk është shkëmbim kulturor. Kënga promovon pretendime të qarta politike mbi territorin e Republikës së Kosovës. Përfshirja e saj në një aktivitet zyrtar të Komisionit Evropian, kushtuar zgjerimit, unitetit dhe marrëdhënieve të fqinjësisë së mirë, është e papranueshme.” – ka shkruar Bajrami.
Ai ka kërkuar sqarim të menjëhershëm nga Komisioni Evropian dhe komisionerja Marta Kos lidhur me mënyrën se si është përzgjedhur dhe miratuar repertori i koncertit. “Vlerat evropiane, marrëdhëniet e fqinjësisë së mirë dhe besueshmëria e procesit të zgjerimit të BE-së nuk mund të pajtohen me dhënien e një platforme pretendimeve irredentiste kundër një vendi që synon anëtarësimin në Bashkimin Evropian.” – ka shkruar Bajrami. Kënga “Oj Kosovo, Kosovo” është interpretuar në mbrëmjen hapëse të edicionit të dytë të Forumit të Zgjerimit të Bashkimit Evropian, i cili organizohet në Bruksel nga Komisioni Evropian. Në programin e ditës kryesore, më 16 nëntor, është paraparë të mbajnë fjalime presidentja e Komisionit Evropian, Ursula von der Leyen, presidenti i Finlandës, Alexander Stubb, dhe komisionerja për zgjerim Marta Kos. Pritet të flasë edhe kryeministri i Shqipërisë, Edi Rama.
Edicioni i dytë i këtij Forumi ka nisur më 15.09.2026 dhe mbaron të hënën. Kosova nuk është e ftuar në këtë Forum.