Skip to content

Presidentja Shiroka Pula: Aktgjykimi i Speciales ngre shqetësime për respektimin e të drejtave të palëve

Presidentja e Republikës së Kosovës, Justina Shiroka Pula, ka reaguar pas aktgjykimit të sotëm të Dhomave të Specializuara në Hagë ndaj Hashim Thaçit dhe të tjerëve, lidhur me akuzat për pengim të administrimit të drejtësisë.

Në reagimin e saj, presidentja ka theksuar se çdo institucion i Republikës së Kosovës, përfshirë edhe Dhomat e Specializuara, duhet të veprojë në përputhje me juridiksionin e përcaktuar me Kushtetutën e Kosovës dhe të respektojë të drejtat dhe liritë themelore të njeriut.

Ajo ka vlerësuar se çdo proces gjyqësor duhet të zhvillohet në përputhje me standardet ndërkombëtare të gjykimit të drejtë, duke garantuar të drejtat e të akuzuarve dhe respektimin e procedurave ligjore.

Sipas presidentes, aktgjykimi i sotëm ngre shqetësime sa i përket respektimit të të drejtave të palëve.

Shiroka Pula ka ritheksuar përkushtimin e Kosovës ndaj drejtësisë, sundimit të ligjit dhe respektimit të të drejtave të njeriut, duke shprehur pritjen që edhe Dhomat e Specializuara të veprojnë në përputhje me këto parime dhe standarde, përfshirë edhe në proceset e ankimit.

Në fund të reagimit, presidentja ka theksuar se kontributi i Ushtrisë Çlirimtare të Kosovës në luftën për liri dhe pavarësi, si dhe sakrifica e popullit të Kosovës, janë pjesë e historisë së vendit dhe nuk mund të vihen në pikëpyetje nga proceset gjyqësore.