Skip to content

Portal amerikanik i udhëtimeve: Harrojeni Zvicrën, pushimet dimërore janë tepër të shtrenjta

pixabay

Një platformë e njohur amerikane e udhëtimeve u rekomandon turistëve pesë destinacione të tjera evropiane si alternativa më të lira për pushimet dimërore. Kjo vjen në një kohë kur turistët amerikanë po luajnë rol gjithnjë e më të rëndësishëm në turizmin zviceran.

Për vite me radhë, Zvicra është promovuar në SHBA si një prej destinacioneve më tërheqëse për pushimet dimërore, falë maleve të mbuluara me borë, vendpushimeve luksoze dhe pistave të skive. Megjithatë, çmimet e larta duket se po ndikojnë në këtë imazh, përcjell albinfo.ch.

Portali amerikan i udhëtimeve “Travel Off Path” ka publikuar një artikull me titullin “Harrojeni Zvicrën”, në të cilin u rekomandon turistëve amerikanë pesë destinacione të tjera evropiane për pushimet dimërore, ku mund të përjetojnë peizazhe malore dhe liqene të bukura me shpenzime dukshëm më të ulëta, raporton albinfo.ch.

Sipas portalit, një qëndrim pesëditor në Zvicër mund të kushtojë 2’000 dollarë ose më shumë, përkatësisht rreth 1’700 franga zvicerane. Blogeri i udhëtimeve Vinicius Costa vlerëson se, në kushtet aktuale ekonomike dhe me çmimet e larta të udhëtimeve, ky destinacion po bëhet gjithnjë e më pak i përballueshëm për shumë turistë amerikanë.

Amerikanët, gjithnjë e më të rëndësishëm për turizmin zviceran

Kritikat për çmimet vijnë në një kohë kur Zvicra ka shënuar rritje të kërkesës nga tregu amerikan. Gjatë sezonit dimëror 2025/2026, turistët nga SHBA-ja regjistruan rreth 1.8 milionë netqëndrime në vend, duke shënuar një rekord.

Interesi nga ky treg ka nxitur edhe investime në sektorin e turizmit malor. Kompania amerikane Vail Resorts po investon në vendpushimet zvicerane Andermatt dhe Crans-Montana.

Në Crans-Montana, numri i netqëndrimeve nga turistët amerikanë është rritur për 74 për qind, duke dëshmuar rëndësinë në rritje të këtij tregu për turizmin lokal.

Pavarësisht kritikave për kostot, Zvicra vazhdon të mbetet një destinacion i kërkuar për turistët ndërkombëtarë, ndërsa çmimet e larta mund të ndikojnë në zgjedhjet e tyre për sezonet e ardhshme dimërore. /Albinfo.ch