Skip to content

albinfo.ch: Mes rrënjëve tona dhe historive që na bashkojnë

Pesëmbëdhjetë vite pranë shqiptarëve në Zvicër, duke përcjellë historitë e tyre, sfidat, arritjet dhe kujtimet që i lidhin me vendlindjen. Një përvjetor që për mua ka edhe një domethënie të thellë personale.

Ka njerëz që largohen nga vendlindja, por vendlindja nuk largohet kurrë prej tyre. Ajo mbetet në gjuhën që flasin me fëmijët, në kujtimet e prindërve, në traditat që ruajnë dhe në mallin që as vitet, as largësia nuk e shuajnë.

Kjo është edhe një pjesë e historisë së shqiptarëve në Zvicër, një histori largimesh, sakrificash, përpjekjesh dhe arritjesh, të cilën Albinfo e ka përcjellë për pesëmbëdhjetë vite radhazi

Për mua, ky përvjetor nuk është thjesht një datë në kalendar, është një mundësi për të kujtuar njerëzit, ngjarjet dhe përvojat që i kanë dhënë kuptim këtij rrugëtimi.

Edhe unë jam pjesë e kësaj historie

Kam ardhur në Zvicër shumë vite më parë, isha adoloshente, e njoh ndjenjën e të jetuarit mes dy vendeve, të ndërtimit të një jete të re, pa harruar atë që ke lënë pas. E di sa shumë përpjekje fshihen pas jetës së një familjeje mërgimtare dhe sa e rëndësishme është që këto përvoja të mos mbeten të patreguara

Albinfo, aty ku historitë tona marrin zë

Në pesëmbëdhjetë vite, albinfo.ch ka qenë pranë diaspores që është rritur, ka ndryshuar dhe ka gjetur vendin e saj në shoqërinë zvicerane.

Në faqet e saj kanë gjetur hapësirë kultura, arsimi, veprimtaritë e shoqatave, nismat qytetare dhe arritjet e shqiptarëve në fusha të ndryshme.

Por përtej lajmeve dhe ngjarjeve, ajo që ka rëndësi janë njerëzit.

Prindërit që kanë punuar për t’u krijuar fëmijëve një të ardhme më të mirë. Të rinjtë që sot studiojnë, krijojnë dhe arrijnë suksese në Zvicër. Njerëzit që, krahas angazhimeve të tyre profesionale, vazhdojnë të kujdesen për gjuhën dhe kulturën shqiptare.

Përvoja të ndryshme, por me një dëshirë të përbashkët: të ndërtojnë të ardhmen pa humbur lidhjen me origjinën.

Këto janë historitë që një media e diasporës ka përgjegjësinë t’i dëgjojë, t’i verifikojë dhe t’i dokumentojë.

Një rrugëtim që e mbaj pranë zemrës

Gazetaria ka qenë pjesë e jetës sime shumë përpara bashkëpunimit me Albinfo-n. Përvojat në 24Heure, Eurozëri, në Radio Televizionin e Kosovës dhe në radio të tjera më kanë mësuar se fjala publike kërkon përgjegjësi, ndershmëri dhe respekt për të vërtetën.

Prej shumë vitesh, si gazetare dhe bashkëpunëtore e Albinfo-s në Zvicrën frankofone, jam përpjekur të jem pranë komunitetit shqiptar, veçanërisht në kantonin e Vaudit.

Kam ndjekur aktivitete kulturore, nisma shoqërore dhe ngjarje që kanë sjellë bashkë bashkatdhetarët tanë. Kam pasur mundësinë të njoh njerëz me përvoja të ndryshme dhe të përcjell historitë e tyre.

Jo çdo histori bëhet lajm i madh. Por çdo njeri që na beson rrëfimin e tij meriton të dëgjohet me të njëjtin respekt.

Krahas gazetarisë, puna ime në kujdesin shëndetësor më mban çdo ditë pranë njerëzve. Këto dy profesione më kanë mësuar diçka të përbashkët: ndonjëherë, gjëja më e rëndësishme që mund të bëjmë për dikë është ta dëgjojmë me vëmendje.

Edhe pse jeta e përditshme sjell angazhime dhe përgjegjësi të shumta, lidhja ime me gazetarinë dhe me Albinfo-n ka mbetur e veçantë.

Sepse për mua, Albinfo nuk është vetëm një vend ku publikoj shkrimet e mia. Është një mundësi për të qëndruar pranë komunitetit tim, për të ndjekur zhvillimet e tij dhe për të kontribuar që historitë e shqiptarëve në Zvicër të marrin vëmendjen që meritojnë.

Pesëmbëdhjetë vite më pas, përgjegjësia vazhdon

Sot, brezat e rinj të shqiptarëve në Zvicër jetojnë një realitet tjetër nga ai i prindërve të tyre. Ata rriten mes gjuhëve dhe kulturave të ndryshme, duke ndërtuar identitetin e tyre dhe duke kontribuar në shoqërinë ku jetojnë.

Edhe gazetaria duhet të ecë me kohën

Të ruajë kujtesën e atyre që erdhën të parët, por edhe t’u japë hapësirë brezave që po ndërtojnë të ardhmen. Të trajtojë sukseset, por edhe vështirësitë. Të jetë pranë komunitetit, pa hequr dorë nga pavarësia, saktësia dhe përgjegjësia profesionale.

Në këtë 15-vjetor, mirënjohja ime shkon për themeluesit, drejtuesit, kolegët dhe të gjithë ata që kanë kontribuar në rrugëtimin e Albinfo-s. Për ekipin me të cilin kam pasur kënaqësinë të bashkëpunoj dhe për lexuesit që na kanë dhënë besimin e tyre.

Dhe nëse sot do të duhej të shprehja me pak fjalë se çfarë përfaqëson Albinfo për mua, do të thosha këtë: Një vend ku historitë e njerëzve tanë nuk mbeten pa zë, ku kujtesa gjen hapësirë dhe ku largësia nga vendlindja nuk na pengon të ndihemi pranë njëri-tjetrit.

Pesëmbëdhjetë vite kanë kaluar. Shumë histori janë shkruar. Shumë të tjera presin të tregohen.

Uroj që albinfo.ch të vazhdojë t’i përcjellë me të njëjtin përkushtim, duke mbetur pranë njerëzve dhe së vërtetës.

Gëzuar 15-vjetorin, albinfo.ch!

Zamira Bytyqi
Gazetare, albinfo.ch