Skip to content

AKB: Vetëm 2 për qind e remitancave të diasporës investohen në biznes dhe prodhim

Kosova ka pranuar rreth 7.16 miliardë euro remitanca nga diaspora gjatë periudhës 2021 – qershor 2026, por sipas Aleancës Kosovare të Bizneseve, vetëm një pjesë e vogël e këtij kapitali po investohet në biznes, industri dhe prodhim vendor.

Aleanca Kosovare e Bizneseve (AKB) ka ngritur shqetësimin për mënyrën e orientimit të remitancave të diasporës, duke vlerësuar se pjesa dërrmuese e tyre shpenzohet për konsum të përditshëm, patundshmëri dhe ndërtim, në vend që të shfrytëzohet për investime që ndikojnë në zhvillimin ekonomik të vendit, transmeton albinfo.ch.

Sipas një studimi dhe vlerësimi të kësaj organizate, nga rreth 7.16 miliardë euro remitanca të pranuara në Kosovë nga viti 2021 deri në qershor 2026, rreth 80 për qind orientohen në konsum, patundshmëri dhe ndërtim, ndërsa vetëm 2 për qind në biznes, industri dhe prodhim. Pjesa tjetër, rreth 18 për qind, destinohet për nevoja të tjera.

Nëse kjo strukturë zbatohet mbi shumën e përgjithshme të remitancave, rezulton se rreth 5.73 miliardë euro janë orientuar në konsum, patundshmëri dhe ndërtim, ndërsa vetëm rreth 143 milionë euro në biznes dhe prodhim.

Të dhënat e prezantuara nga AKB-ja tregojnë se remitancat kanë shënuar rritje të vazhdueshme ndër vite. Në vitin 2021, Kosova pranoi 1.15 miliardë euro, në vitin 2022 rreth 1.22 miliardë, në vitin 2023 rreth 1.33 miliardë, ndërsa në vitin 2024 rreth 1.35 miliardë euro.

Gjatë vitit 2025, kjo shumë arriti në 1.4 miliardë euro, ndërsa vetëm në gjashtë muajt e parë të vitit 2026, diaspora dërgoi rreth 690.7 milionë euro në Kosovë.

Pavarësisht rritjes së këtyre mjeteve financiare, AKB vlerëson se potenciali investues i diasporës mbetet i pashfrytëzuar sa duhet, veçanërisht në krijimin e ndërmarrjeve prodhuese, hapjen e fabrikave, zhvillimin e industrisë dhe rritjen e eksporteve.

Për këtë arsye, organizata i ka kërkuar Qeverisë së Kosovës hartimin e një strategjie të veçantë për orientimin e investimeve të diasporës drejt prodhimit vendor, industrisë, teknologjisë dhe eksportit.

Kryetari i AKB-së, Agim Shahini, ka theksuar se institucionet duhet të krijojnë kushte më të favorshme për investitorët nga diaspora, duke përfshirë sigurinë juridike, lehtësirat fiskale dhe politika konkrete për mbështetjen e bizneseve.

Sipas Shahinit, Kosova ka nevojë që kapitali i diasporës të shndërrohet në investime afatgjata, të cilat krijojnë fabrika, vende të reja pune dhe rrisin kapacitetet eksportuese të vendit./Albinfo.ch