Salla modeste koncertale në qendër të Vjenës ishte e vogël për të zënë të gjithë ata dashamirë të letërsisë shqipe të cilët me shumë interesim ndoqën edhe një aktivitet tjetër kulturor. Kryeqytetit të Austrisë ia kishin mësyrë edhe aktivistë dhe intelektualë nga Linci, Graci, Knittelfeld-i e qytete të tjera.
Të pranishmit fillimisht i përshëndeti Anton Marku, kryetar i Lidhjes së Shkrimtarëve dhe Krijuesve Shqiptarë në Austri ‘‘Aleksandër Moisiu’’, i cili ndër të tjera, theksoi: ‘‘Lidhja jonë sivjet feston 15 vjetorin e themelimit. Ky është aktiviteti i pestë për këtë vit, ndërsa mu në këtë sallë, me 2 dhjetor do të mbështesim edhe një prezantim libri, kësaj radhe një romani me autore Maklena Nika nga Tirana.
Në muajin shkurt, bashkë me Ambasadën e Kosovës mirëpritëm krijuesit Blerina Rogova-Gaxha dhe Emin Z. Eminin, në maj prezantuan librin e anëtares sonë, Gabriela Mujaj ‘‘I dashtuni im zdrukthtar’’, në shtator u prezantuam para Lidhjes së Shkrimtarëve Katolikë në Austri me lexime të teksteve tona në gjuhën gjermane dhe në tetor, bashkë me Ambasadën e Kosovës dhe shoqatën KA, kishim një orë letrare edhe bashkëbisedim me shkrimtaren e njohur nga Tirana, Mimoza Ahmeti.
Përndryshe para disa javëve Lidhja jonë zhvilloi zgjedhjet e rregullta dhe zgjodhi strukturat udhëheqëse duke mundësuar që pjesë e saj të bëhen edhe krijuese dhe krijues të rinj, të cilët do të bartin peshën e organizimeve të tilla në të ardhmen. Përpos prezantimit të kulturës shqiptare me fokus në letërsi, një ndër synimet tona kryesore është edhe ruajtja dhe kultivimi i gjuhës shqipe në mërgatë. Shpresoj se këtë gjë do ta bëjmë edhe së paku për 15-të vitet e ardhshme.’’
Mbrëmja artistike ishte e ndarë në dy pjesë. Në pjesën e parë u prezantuan katër libra të autorëve shqiptarë me banim në Austri sipas kësaj renditjeje: ‘‘Kthim në kohë’’ me autore Kimete Prebreza-Krasniqin për të cilin referuan dy mysafiret e ardhura enkas nga Kosova për këtë manifestim, magjistret Selvete Berisha-Krasniqi dhe Sofije Gagica. Më pas i erdhi radha librit autobiografik ‘‘Udha e jetës’’ , shkruar nga Zaim Toska e për të cilin foli redaktorja Violeta Allmuça si dhe vetë autori. Biografinë e Fitnete Bashota-Krasniqi e lexoi Fjolla Krasniqi ndërsa autorja lexoi nga përmbledhja e saj me poezi ‘‘Baladë shpirti’’.
Në fund Dëshire Manuka-Shehu paraqiti një vështrim për librin e Hava Elshanit me titull ‘‘Guxova’’, pjesë të përzgjedhura të të cilit i lexuan edhe Diart Elshani dhe vetë autorja.
Në pjesën e dytë në skenë dolën disa nga anëtaret e Lidhjes së Shkrimtarëve dhe Krijuesve Shqiptarë në Austri ‘‘Aleksandër Moisiu’’: Violeta Allmuca deklamoi poezinë ‘‘Kohë për shpirtin’’, Angjelina Marku solli një fragment të shkurtër nga romani i saj ‘‘Shtyje hënën’’ dhe Fitnete Bashota-Krasniqi interpretoi poezinë ‘‘Kosova ime’’.
Kësaj mbrëmje artistike i dhanë një shije të veçantë edhe udhëheqësja e programit Marinela Stefanc dhe pikat muzikore të luajtur me mjeshtri në kitarë nga Flamur Ahmeti.
Lidhja e Shkrimtarëve dhe Krijuesve Shqiptarë në Austri ‘‘Aleksandër Moisiu’’ është themeluar në vitin 2011. Ajo është adresë e parë e krijuesve shqiptarë në Austri dhe pikë referimi për sa i përket letërsisë shqipe në këtë shtet.
Duke u imponuar me një qasje serioze dhe kualitet në organizimin e më shumë se 80 orëve letrare dhe promovimeve të librave, ajo ka komunikuar në mënyrë shumë të frytshme me institucionet në nivel kombëtar, si Ministritë e Kulturës, të Arsimit dhe Diasporës, me Ambasadat e Shqipërisë dhe Kosovës në Vjenë, me shoqatat dhe individët e ndryshëm, etj.
Ajo po ashtu ka bashkëpunim shumë domethënës edhe me organizatat austriake, sidomos me PEN Klubin e Austrisë dhe Lidhjen e Shkrimtarëve të Austrisë.
Tekstin e përpiloi: Anton Marku



