Skip to content

Zvicra riciklon vagonët e vjetër të trenave, materialet ripërdoren në industri

pixabay

Hekurudhat Federale Zvicerane (SBB) po zbatojnë praktika të ekonomisë qarkore, duke ricikluar vagonët e vjetër të trenave dhe duke ripërdorur pjesët që janë ende në gjendje të mirë.

Një kompani në kantonin Aargau blen çdo vit rreth 100 vagonë të vjetër të SBB-së, nga të cilët përpunohen rreth 4.500 tonë metale, përfshirë çelikun, aluminin dhe bakrin. Materialet e rikuperuara përdoren më pas si lëndë e parë për prodhimin e automobilave dhe pajisjeve elektroshtëpiake.

Sipas kompanisë, një ton alumin i ricikluar kursen rreth dhjetë tonë CO₂, krahasuar me prodhimin e aluminit të ri.

Përveç riciklimit, SBB po rikuperon edhe pjesë funksionale të vagonëve, si bogiet dhe dritaret, për t’i përdorur në projekte të tjera. Rreth 1.000 xhama nga vagonët e prodhuar në vitet 1980 pritet të ripërdoren në fasadën e një ndërtese të re në Cyrih.

Në SBB vlerësojnë se ripërdorimi i materialeve ndihmon në uljen e kostove, zgjatjen e jetëgjatësisë së pajisjeve dhe kursimin e burimeve natyrore.

Kompania disponon gjithsej më shumë se 77 milionë tonë materiale, duke përbërë një nga rezervat më të mëdha të materialeve në Zvicër.