Zvicra konfirmon mbështetjen për FSK-në

Ministri i Forcave të Sigurisë, Haki Demolli falënderoi Qeverinë e Zvicrës për ndihmën e madhe që po i jep Kosovës në angazhimin e ekspertëve ushtarak të deminimit

Ambasadorja e Zvicrës në Republikën e Kosovës, Krystyna Marty Lang e siguroi ministrin e Forcës së Sigurisë së Kosovës (MFSK), Haki Demolli se Konfederata zvicerane do ta mbështesë FSK-në gjatë viteve të ardhshme dhe premtoi bashkëpunim edhe më të mirë ndërmjet kësaj trupe dhe Forcave të Armatosura të Zvicrës.

Ambasadorja Lang u takua sot me ministrin e FSK-së, Haki Demolli i cili fillimisht e falënderoi Qeverinë e Zvicrës për ndihmën e madhe që po i jep Kosovës dhe FSK-së, në veçanti në angazhimin e ekspertëve ushtarak të deminimit të cilët janë të angazhuar në pastrim të fushave të minuara në Kosovë.

Ministri Demolli gjithashtu falënderoj diplomaten Lang edhe për kontributin e Kontigjentit të ushtrisë së Zvicrës në kuadër të KFOR-it në Kosovë si dhe me këtë rast ministri kosovar e njoftoi ambasadoren edhe për zhvillimet e përgjithshme në MFSK dhe FSK, me theks të veçantë me procesin e transformimit të FSK-së, në Forcat e Armatosura të Kosovës.

Ministri i Ministrisë për FSK, Haki Demolli i shprehu ambasadores Lang, interesimin për rritjen e kapaciteteve të FSK-së në të drejtën humanitare ndërkombëtare si dhe sfera tjera që kanë të bëjnë me çështjet gjinore, gjithashtu në kuadër të këtyre edhe trajnimin dhe shkollimin e kuadrove të FSK-së në shtetin e Zvicrës.

Nga ana e saj, ambasadorja zvicerane, siç thuhet njoftimin e MFSK-së, ka shprehur kënaqësinë për pritjen që iu bë nga ministri Demolli, dhe për bashkëpunimin e deritashëm në mes dy shteteve, posaçërisht në mes FSK-së dhe Forcave të Armatosura të Zvicrës.

Ambasadorja Lang në fund u shpreh se ky bashkëpunim do vazhdojë edhe në të ardhmen në mes dy shteteve mike dhe në mes FSK-së dhe Forcave të Armatosura të Zvicrës.