A mundet inteligjenca Artificiale të ndihmojë në ndalimin e pastrimit të parave

Në Norvegji, startup-i Strise ka ndërtuar një platformë që skanon regjistrat publikë dhe raportet mediatike, duke identifikuar në kohë reale rreziqet e mundshme të pastrimit të parave

Bankat dhe institucionet financiare po përballen me një rritje të mashtrimeve dhe pastrimit të parave, si dhe me presionin për t’iu përmbajtur rregulloreve gjithnjë e më të ashpra financiare.

Pavarësisht se shpenzimet në këtë sektor u zgjeruan deri në 10 për qind çdo vit në disa tregje të avancuara midis 2015 dhe 2022, industria financiare arrin të zbulojë vetëm rreth 2 për qind të fluksit global të krimeve financiare, sipas Interpol.

Disa ekspertë besojnë se inteligjenca artificiale mund të ndihmojë në lehtësimin e kësaj barre. Në Norvegji, startup-i Strise ka ndërtuar një platformë që skanon regjistrat publikë dhe raportet mediatike, duke identifikuar në kohë reale rreziqet e mundshme të pastrimit të parave, shkruan Scan, transmeton albinfo.ch.

Ky agjent është projektuar për të verifikuar aplikimet e reja për hapjen e llogarive në institucionet financiare që i nënshtrohen ligjit evropian, si bankat, kompanitë e sigurimeve dhe shërbimet e pagesave.

Kur hapni një llogari bankare “online”, zakonisht kërkohen të dhëna si adresa dhe profesioni, si dhe t’i përditësoni ato çdo vit. Procesi është një kërkesë ligjore që verifikon identitetin e klientëve dhe burimin e parave të tyre. Këto kontrolle synojnë të ndalojnë kriminelët që të përdorin bankat ligjore për të lëvizur para të paligjshme, por janë të ngadalta dhe të shtrenjta.

“Tani mund ta realizojmë këtë proces me anë të inteligjencës artificiale, që merr informacionin dhe e përpunon në një mënyrë krejt të re,” thanë burime zyrtare të kompanisë Strise. “Nëse mund të identifikosh një kompani të dyshimtë që në momentin e hapjes së llogarisë, mund ta parandalosh aksesin e saj në shërbime financiare,” theksuan ata.

Sistemi inovator identifikon automatikisht shenjat paralajmëruese, si lidhjet me individë të sanksionuar, juridiksione me rrezik të lartë ose figura politike që mund të preken nga korrupsioni. Kompania thotë se institucionet financiare që përdorin platformën e saj kanë arritur të identifikojnë dhe refuzojnë firmat me rrezik të lartë në mënyrë efikase, duke rritur kapacitetin për trajtimin e rasteve deri në dhjetëfish, pa shtuar staf.

Aktualisht, Bashkimi Evropian po finalizon Autoritetin Kundër Pastrimit të Parave në Frankfurt dhe një direktivë të re që do të hyjë në fuqi në vitin 2027, me synimin për të luftuar financimin e terrorizmit.

---