Aargau: Mbi 50 raportime për policë të rremë, në vetëm dy ditë

Megjithatë, kriminelët e prezantuar si policë, nuk kanë mundur të gjenin asnjë viktimë

Kohëve të fundit në Zvicër ka një rritje të theksuar të numrit të mashtruesve që paraqiten në rolin e policëve, me dynimin për të përfituar materialisht nga naiviteti i qytetarëve, kryesisht të moshuar që bien viktimë e tyre.

Por, kjo që ka ndodhur në Kantonin Aargau është diçka që tejkalon gjithë këtë. Policia e kantonit të Aargaut ka marrë mbi 50 raportime për policë të rremë vetëm  të premten dhe të shtunën, njofton Agjencia e Lajmeve e Zvicrës, SDA.

Megjithatë, kriminelët e prezantuar si policë, nuk kanë mundur të gjenin viktima.

Më shumë se 50 thirrje u raportuan nga lindja e kantonit, zona e Baden dhe Brugg, ka raportuar policia e kantonit Aargau të shtunën, trasnmeton albinfo.ch. Shablloni i këtij mashtrimi njihet prej kohësh, shkruan policia.

Telefonuesit pretendonin se ishin policë dhe donin t’i bindnin të thirrurit se ishin në shënjestër të hajdutëve. Prandaj, sipas tyre, ata duhet t’i dorëzojnë gjërat me vlerë dhe paratë e tyre në polici për të qenë të sigurt.

Me këtë rast policia këshillon që të mos u jepen kurrë para ose sende me vlerë të huajve të panjohur, edhe nëse ata tingëllojnë shumë të besueshëm në telefon, përcjell albinfo.ch. Kjo, edhe për faktin se policia nuk kërkon kurrë që të marrë para ose sende me vlerë për t`i ruajtur.

---