Afati i fundit për vendimin e Kushtetueses për bllokadën në Kuvend

Masa e përkohshme për Kuvendin përfundon sot, sytë nga Kushtetuesja

Sot Gjykata Kushtetuese pritet të nxjerrë vendim lidhur me bllokadën e krijuar në Kuvendin e Kosovës, përcjell albinfo.ch.

Më 26 korrik ka përfunduar afati i vendosur nga Kushtetuesja për konstituimin e Kuvendit. Pas kësaj, Gjykata vendosi një masë të përkohshme që nuk i lejoi deputetët të marrin asnjë veprim për konstituimin e Kuvendit për dy javë, deri më 8 gusht.

Për bllokadën në Kuvend në Kushtetuese janë deponuar tri kërkesa, një nga presidentja Vjosa Osmani, një nga Partia Demokratike e Kosovës dhe një nga Lidhja Demokratike e Kosovës. 

Presidentja Osmani ka tërhequr kërkesën meqë gjykata për këtë lëndë e ka caktuar gjyqtar raportues Radomir Labanin. Sipas Osmanit, në bazë të informacioneve të institucioneve të sigurisë, gjyqtari serb përbën rrezik për rendin kushtetues të Kosovës.

Deputetët e zgjedhur në zgjedhjet e 9 shkurtit kanë dështuar ta konstituojnë Kuvendin në dhjetëra vazhdime të mbajtura çdo 48 orë të seancës konstituive që ka nisur më 15 prill. 

Bllokada është shkaktuar te pika e tretë e rendit të ditës,  zgjedhja e kryetarit.

Në vazhdimet e para, Lëvizja Vetëvendosje si fituese e zgjedhjeve, e propozoi Albulena Haxhiun për kryeparlamentare, por ajo nuk i mori votat e mjaftueshme në disa tentime.

Më pas LVV-ja, falë edhe kryesuesit të seancës Avni Dehari, që vjen nga kjo parti, tentoi ta ndryshonte formën e votimit  nga i hapur, në i fshehtë. Dhe për votim të fshehtë u tentua të krijohet një komision, që për gati 50 votime nuk i ka marrë votat e mjaftueshme. Opozita e deritashme e ka quajtur në vazhdimësi të kundërligjshëm këtë veprim të LVV-së.

---