Afro 3 milionë pasagjerë kanë shfrytëzuar Aeroportin e Cyrihut gjatë shtatorit

Numri i pasagjerëve në shtator ka qenë 2 milionë e 890.000, ose për 0.3% më i madh se në shtatorin e vitit 2018

Gjatë muajit shtator, Aeroportin e Cyrihut e kanë shfrytëzuar për të fluturuar ose për të aterruar në të pak më tepër njerëz se në muajin e njëjtë të vitit paraprak, shkruan srf.ch. Kështu, numri i pasagjerëve në shtator ka qenë 2 milionë e 890.000, ose për 0.3% më i madh se në shtatorin e vitit 2018, bën të ditur njësia që menaxhon Aeroportin  e Cyrihut.

Nga ana tjetër, numri i fluturimeve në shtator ka pasur një rënie për 1.9% në krahasim me shtatorin e vitit 2018, transmeton albinfo.ch. Pra, janë zhvilluar gjithsej 24300 nisje dhe aterrime në këtë aeroport. Ky shpërpjestim në mes të uljes së numrit të fluturimeve dhe rritjes së numrit të pasagjerëve shpjegohet me faktin se janë shfrytëzuar aeroplanë më të mëdhenj dhe është shfrytëzuar më mirë kapaciteti i tyre.

Është interesante se rreth ¾ e pasagjerëve që kanë shfrytëzuar shërbimet e këtij aeroporti kanë fluturuar në ndonjë vend evropian ose kanë ardhur këtu nga një vend po ashtu evropian.

Numri i pasagjerëve gjatë nëntë muajve të këtij viti është rritur për 1.6%.

---