AGK shpreh ngushëllime për vdekjen e Violeta Rexhepagiqit

Rexhepagiqi do të kujtohet gjithmonë si një profesioniste e gazetarisë, e cila për shumë vite ka punuar në RTP, pastaj në RTK, ndërsa gjatë viteve të 90′ ishte edhe korrespodente në TV Sky News.

Asociacioni i Gazetarëve të Kosovës (AGK) më pikëllim të thellë ka marrë lajmin për ndarjen nga jeta të ish-gazetares dhe kompozitores, Violeta Rexhepagiqi.

Rexhepagiqi do të kujtohet gjithmonë si një profesioniste e gazetarisë, e cila për shumë vite ka punuar në RTP, pastaj në RTK, ndërsa gjatë viteve të 90′ ishte edhe korrespodente në TV Sky News. Ajo ka dhënë kontribut të madh në fushën e gazetarisë dhe informimit për ngjarjet, torturat dhe burgosjet që kanë ndodhur në Kosovën e para luftës.

Rexhepagiqi ishte e njohur edhe me paraqitjet në grupin e muzikës “Vivien” rreth vitit 1984. Gjatë kësaj kohe, ajo përfaqësoi dy herë Kosovën në përzgjedhjen e përfaqësueses së Jugosllavisë për “Këngën e Eurovizionit”.
AGK, iu shpreh ngushëllime familjarëve, miqve dhe kolegëve të ish-gazetares Rexhepagiqi.

Zëdhënësja në rajonin e Prishtinës, Flora Ahmeti, ka deklaruar për Koha.net se e ndjera është gjetur e vdekur në shtëpinë e saj.

“Sot rreth orës 09:30 policia ka marrë informatën se në rrugën “Ferat Dragaj” në Prishtinë, saktësisht në një shtëpi, gjendet një person pa shenja jete. Me të marrë informatën policia ka dalë në vendin e ngjarjes, ku ka hasur viktimën grua, e cila ishte pa shenja jete. Vdekjen e viktimës e ka konstatuar ekipi mjekësor në vendin e ngjarjes”, tha Ahmeti.

PK-ja shtoi se aktualisht njësitet policore në koordinim me Prokurorin e shtetit, janë duke u ndërmarrë të gjitha veprimet e nevojshme lidhur me këtë rast.

 

---