Aksident tragjik në Itali, humb jetën një 20-vjeçar shqiptar

Aksident fatal në Itali, ndërron jetë një 20-vjeçar shqiptar

Një aksident tragjik ka ndodhur ditën e djeshme në Itali, ku si pasojë ka humbur jetën një i ri shqiptar, rreth 20 vjeç. Viktima, e identifikuar me inicialet K.Gj., ishte me origjinë nga Lezha dhe banonte prej kohësh në Itali, transmeton albinfo.ch.

Sipas mediave italiane, ngjarja e rëndë ka ndodhur në autostradën e Rrugës Shtetërore 589, në segmentin Saluzzo–Barge, në kilometrin e 53-të, pranë zonës së Abacisë së Stafardës.

Aksidenti është shkaktuar si pasojë e një përplasjeje të fortë mes një kamioni dhe një automjeti tip “Audi”, i cili drejtohej nga i riu shqiptar. Përplasja ka qenë fatale për 20-vjeçarin, i cili ka ndërruar jetë në vendngjarje.

Pas aksidentit, rruga është mbyllur për disa orë, duke shkaktuar trafik dhe vështirësi të mëdha në qarkullim. Autoritetet italiane kanë nisur hetimet për zbardhjen e plotë të rrethanave të ngjarjes./Albinfo.ch

---