Ambasada amerikane reagon sërish ndaj politikanëve të Kosovës

Ambasada e Shteteve të Bashkuara në Kosovë me anë të një komunikatë për media dënon përpjekjet e fundit për të shfuqizuar ligjin për Gjykatën Speciale.

Gjithashtu në këtë komunikatë shprehet shqetësim i thellë edhe për faljet e fundvitit nga presidenti i Kosovës, Hashim Thaçi, përcjell albinfo.ch.

“Dhomat e Specializuara, në veçanti janë pjesë e rëndësishme e përkushtimit të Kosovës për sundim të ligjit dhe angazhimit të Kosovës për të adresuar krimet e kryera në territorin e saj”.

Komunikata flet edhe në emër të vendeve të QUINT-it.

“Vendet e QUINT-it kanë qenë prej kohësh miq të vërtetë të Kosovës, përfshirë këtu edhe në kohërat më të vështira. Që nga mbështetja jonë për ndërhyrjen e NATO-s, sakrifikimin e ushtarëve tanë në Kosovë, njohjen e menjëhershme të pavarësisë së Kosovës dhe mbështetjen tonë të vazhdueshme në zhvillimin tuaj, ne kemi punuar shumë për të mbështetur vendin tuaj. Suksesi juaj është në interesin tonë. Megjithatë, ne do të këmbëngulim gjithmonë që Kosova të mbështesë drejtësinë”, thuhet në komunikatë, duke shtuar:

“Kjo i vënë interesat e individëve mbi interesat e shoqërisë kosovare. Ne e dënojmë një gjë të tillë, dhe kushdo që mbështetë një gjë të tillë, do të veprojë qëllimisht kundër partneritetit të Kosovës me vendet tona”.