Ambasada e SHBA-së përsëri kërkon formimin e Qeverisë, sa më shpejt

Ambasada Shteteve të Bashkuara të Amerikës në Prishtinë ka konfirmuar se kanë kërkuar nga liderët e Lidhjes Demokratike të Kosovës në takimin e sotëm formimin sa më të shpejtë të qeverisë së re.

Ndërkombëtarët janë duke vazhduar thirrjet drejtuar Lëvizjes Vetëvendosje dhe Lidhjes Demokratike të Kosovës për t’u marrë vesh sa më shpejt për formim të koalicionit qeverisës. Të njëjtët sot gjatë ditës, për të përsëritur këtë thirrje kanë shkuar në selinë qendrore të LDK-së në Prishtinë, parti kjo që po insiston në disa kushte për të hyrë në koalicion me partinë e parë, Lëvizjen Vetëvendosje, të udhëhequr nga Albin Kurti, shkruan GE, përcjell albinfo.ch.

Ambasadori amerikan, Philip Kosnett, ka qëndruar për më shumë se një orë sot në zyrat e LDK-së, nga ku ka biseduar nga afër më fytyrat kyçe të partisë, Isa Mustafën dhe tre nënkryetarët, Agim Veliu, Vjosa Osmani dhe Lutfi Haziri.

Kjo ambasadë nuk kanë pranuar të japin detaje se cilën parti e bëjnë fajtor për zvarritje të procesit, e nuk kanë komentuar se a do të përkrahin një qeveri të krijuar nga forcat e tjera politike në vend.

Nga Ambasada amerikane në Prishtinë tutje kanë deklaruar se nuk kanë çfarë të shtojnë, pos asaj që është thënë në komunikatën e 26 dhjetorit, në ditën e konstituimit të Kuvendit të Kosovës.

---