Ambasadat e Francës dhe Kosovës urojnë aktoren Luana Bajrami për suksesin në Oscar

Filmi francez “Two People Exchanging Saliva” fiton çmimin për filmin më të mirë të shkurtër, ndërsa vlerësohet edhe performanca e aktores franko-kosovare

Ambasada e Francës në Kosovë dhe Ambasada e Kosovës në Francë kanë uruar publikisht ekipin e filmit francez “Two People Exchanging Saliva” për suksesin e arritur në ceremoninë prestigjioze Academy Awards 2026, transmeton albinfo.ch.

Filmi është vlerësuar me çmimin Oscar për filmin më të mirë të shkurtër (Live Action Short Film), duke u cilësuar si një vepër origjinale dhe e guximshme që ka tërhequr vëmendjen e jurisë ndërkombëtare.

Në mesazhin e tyre, ambasadat kanë vlerësuar veçanërisht interpretimin e aktores franko-kosovare Luana Bajrami, e cila është pjesë e këtij projekti fitues.

Sipas tyre, suksesi i këtij filmi dhe roli i Bajramit përbëjnë një dëshmi të qartë të talentit që artistët me origjinë nga Kosova po shfaqin gjithnjë e më shumë në skenën ndërkombëtare të filmit.

“Një vlerësim i jashtëzakonshëm për këtë vepër origjinale dhe të guximshme”, thuhet në mesazhin e publikuar nga Ambasada e Francës në Kosovë, duke theksuar rëndësinë e këtij çmimi për industrinë kinematografike.

Ky sukses shënon një tjetër arritje për artistët shqiptarë në arenën globale, duke forcuar prezencën e tyre në industrinë ndërkombëtare të filmit dhe duke promovuar talentin kosovar përtej kufijve./ Albinfo.ch 

---