Ambasadori britanik: Nuk ka politikë me virusin, populli i Kosovës nuk meriton më pak

Ambasadori i Britanisë së Madhe në Kosovë, Nicholas Abbot, iu ka bërë thirrje politikanëve të mos merren me politikë në këtë periudhë të koronavirusit.

Ai përmes një shkrimi në profilin e tij në Facebook ka theksuar që bashkëpunimi ndëretnik i politikanëve shqiptarë dhe serbë është për t’u admiruar.

“Në këtë kohë të vështirë, bashkëpunimi mes komuniteteve, që e kemi parë javën e shkuar mes ministrave Arben Vitia dhe Dalibor Jevtiq, dhe mes kryekomunarëve Agim Bahtiri e Goran Rakiq në Mitrovicë, është i mirëpritur dhe përshëndetur. Siç ka thënë edhe Mbretëresha dje, nëse jemi të bashkuar dhe të vendosur, do të tejkalojmë këtë sëmundje. Nuk ka politikë me virusin. Populli i Kosovës nuk meriton më pak”, shkroi ai në Facebook.

Deri më tani në Kosovë janë regjistruar 165 raste me koronavirus, prej tyre 24 janë shëruar, ndërsa 3 persona kanë vdekur, përcjell Albinfo.ch.