Ambasadori gjerman: Vonesat me vizat e punës, për shkak të fluksit të madh

“Ne vetëm në vitin e kaluar kemi pasur një rritje të shqyrtimit të kërkesave prej rreth 20 për qind"

Ambasadori gjerman në Kosovë, Christian Heldt, në një intervistë për Deutsche Welle ka treguar përse po ndodhin vonesa me vizat e punës në Gjermani. “Ne vetëm në vitin e kaluar kemi pasur një rritje të shqyrtimit të kërkesave prej rreth 20 për qind.

Duhet të merret parasysh që liberalizimi i vizave, i cili nuk ka ngjarë ende, edhe neve po na shkakton probleme të mëdha të kapaciteteve. Kjo për faktin se ne, krahas vizave afatgjate, lëshojmë edhe viza turistike”, ka shpejguar Heldt.

Ambasadori ka treguar se deri sa të bëhet liberalizimi i vizave, do të mbeten të varur nga kapacitetet e kufizuara.

“Përpunimi i vizave afatgjata kërkon më shumë kohë, se sa i kërkesave për vizë turistike. Për fat të keq, kemi konstatuar që po keqpërdoren edhe kontratat e punës, do të thotë, ka gjithnjë e më shumë kontrata pune, të cilat nuk përputhen me faktet dhe pjesërisht janë të falsifikuara”, ka thënë ai.