Angazhim i përbashkët për të mirën e biznesit

Pas publikimit të një raporti negativ të Bankës Botërore, kryetari i Prishtinës, Isa Mustafa dhe ministrja e Tregtisë dhe Industrisë, Mimoza Kusari-Lila janë takuar për të diskutuar mënyrat e përmirësimit të kushteve për të bërë biznes në Prishtinë.

Sipas një raporti të Bankës Botërore i cili është publikuar kohë më parë, vlerësohej se nga 22 qytete të shteteve të ndryshme të Evropës Juglindore, Prishtina mbetet qyteti ku më së vështiri bëhet biznes.

Kryetari i Prishtinës, Isa Mustafa ka deklaruar se për faktin që ka një numër të madh biznesesh në kryeqytet, bashkëpunimi ndërinstitucional është i rëndësishëm për të plotësuar kriteret e Bashkimit Evropian.

Ndërkaq duke pasur parasysh raportin negativ të Bankës Botërore, ministrja e Tregtisë dhe Industrisë, Mimoza Kusari-Lila ka thënë se me prioritet duhet të jetë reformimi i ambientit për të bërë biznes në Prishtinë.

Ministrja Kusari-Lila dhe kryetari Mustafa, janë pajtuar që bashkëpunimi ndërmjet tyre të vazhdoj edhe në të ardhmen dhe sipas tyre takime të tilla të punës do të ketë në vazhdimësi.

Raporti i fundit i Bankës Botërore “Të bësh biznes në Evropën Juglindore 2011”, ka dërguar sinjale negative tek investitorët që dëshirojnë të investojnë kapitalin e tyre në Kosovë.Për të hapur një biznes në Prishtinë janë të nevojshëm 10 procedura, të cilat marrin 58 ditë kohë, ndërsa në Shkup nevojiten vetëm 3 ditë për të nisur një biznes.