Angela Merkel ia mësyn mandatit të katërt

Angela Merkel ka konfirmuar se do të kandidojë edhe mandatin e katërt si Kancelare e Gjermanisë.

(AP Photo/Markus Schreiber)

Merkel zhvilloi sot një mbledhje me kryesinë e partisë së saj të qendrës së djathtë. “E kam menduar këtë skenar për një kohë të gjatë dhe jam e gatshme të konkurroj përsëri për këtë post”, tha Merkel, përcjell albinfo.ch.

Nëse Merkel fiton në zgjedhjet e vitit të ardhshëm dhe shërben për një mandat të plotë katërvjeçar, ajo do të jetë kancelarja e dytë pas Helmut Kohl, i cili qëndroi në post për një periudhë rekorde prej 16 vjetësh.

62-vjeçarja Merkel është parë gjerësisht si një forcë stabiliteti në Evropë, në një kohë kur Bashkimi Evropian mori një goditje të fortë nga Brexiti dhe nga forcimi i rrymave të ekstremit të djathtë që kanë marrë edhe më shumë zemër nga fitorja e Donald Trumpit në Shtetet e Bashkuara.

Merkel është Kancelare e Gjermanisë që nga 2005. Ajo ka udhëhequr ekonominë më të madhe të Eurozonës gjatë krizës së borxheve, duke fituar respekt të gjerë ndërkombëtar. Presidenti Obama e cilësoi Angela Merkelin një “aleate të shkëlqyer” gjatë vizitës së fundit në Gjermani.

Por, ajo është përballur edhe me sfida të vështira, sidomos për politikat ndaj krizës së refugjatëve. Në shtator ajo tha se duhet ta kishte trajtuar ndryshe këtë krizë, pasi partia e saj pësoi një humbje të rëndë në zgjedhjet e Landit të Berlinit.