Aplikimi nga diaspora, thyhet rekordi

109 mijë prej tyre janë aprovuar, mbi shtatë mijë janë refuzuar, ndërsa mbi 25 mijë të tjera janë në pritje për shqyrtim

Komisioni Qendror i Zgjedhjeve ka njoftuar se me t’u mbyllur periudha për regjistrimin e votuesve nga jashtë Kosovës për zgjedhjet e parakohshme të 7 qershorit, janë pranuar mbi 142 mijë kërkesa për regjistrim.

Me mbi 140 mijë kërkesa për votim nga jashtë vendit, diaspora ka shënuar numrin më të lartë të aplikimeve, duke kaluar edhe zgjedhjet e vitit 2021, kur ishin regjistruar rreth 130 mijë aplikime, transmeton albinfo.ch.

Zëdhënësi i KQZ-së, Valmir Elezi, ka bërë të ditur për KOHËN se mbi 109 mijë prej tyre janë aprovuar, mbi shtatë mijë janë refuzuar, ndërsa mbi 25 mijë të tjera janë në pritje për shqyrtim.

Mënyra më e përzgjedhur për të votuar, sipas tij  është votimi përmes postës.

Ai tutje ka njoftuar se votimi përmes postës do të zhvillohet më herët, nga 25 maji deri më 6 qershor, ndërkaq votimi në përfaqësi diplomatike organizohet më 6 qershor. “Për votimin me postë, janë funksionalizuar kutitë postare në 23 shtete të ndryshme të botës, përfshirë Kosovën, dhe adresat e tyre do të bëhen publike gjatë kësaj jave. Kurse, për votimin fizik në përfaqësi diplomatike, KQZ do të saktësojë numrin e ambasadave dhe konsullatave në të cilat do të organizohet ky lloj votimi. Sipas vendimit fillestar, procesi i votimit planifikohej të organizohet në 48 përfaqësi diplomatike me gjithsej 70 vendvotime, prej të cilave 33 ambasada dhe 15 konsullata”, ka theksuar ai.

---