Arrestohen çifti shqiptar në Greqi, e lanë djalin autik të vdiste në makinë

Një 23 vjeçar shqiptar, i diagnostikuar me autizëm, ka ndërruar jetë pasi është gjetur pa ndjenja brenda një makine ku kishte qëndruar për orë të tëra nën temperatura të larta.

Ngjarja ka ndodhur ditën e djeshme në Amarinthos të Evias në Greqi. Petrit dhe Vezire E. 56 dhe 48 vjeç nga Durrësi, kanë gjetur brenda automjetit të tyre, të lënë të parkuar dhe të pasiguruar jashtë banesës, djalin e tyre Skerdi E. 23 vjeç, i cili ishte pa ndjenja. Ai është transportuar në spital rreth orës 12.00 dhe rreth orës 23:30 ka ndërruar jetë.

Në orët e para të mëngjesit të së hënës, policia greke ka arrestuar dy prindërit Petrit e Vezire Elezi me akuzën se kanë lënë të pafuqishëm djalin e tyre, i cili vuante nga një çrregullim neuropsikologjik, konkretisht autizëm – prapambetje mendore, me pasojë vdekjen. Gjithashtu është urdhëruar kryerja e autopsisë së viktimës.