Arrestohet në Suedi i dyshuari për vrasjen e prindërve në Prizren

Në hetime janë të përfshira edhe autoritetet suedeze.

Institucionet e drejtësisë më në fund kanë arritur t’i bien në gjurmë djalit të vogël të famljes Hadri, i cili po kërkohet për vrasjen e prindërve të tij, Durim dhe Suada Hadrit. Ai është arrestuar sot. Në hetimet për këtë rast janë përfshirë edhe autoritetet suedeze.

Lajmin për mediat kosovare e ka konfirmuar Prokuroria Themelore e Prizrenit.

“Prokuroria Themelore në Prizren njofton opinionin se sot, më 03.03.2020, është arrestuar A.H., i dyshuar për vrasjen e prindërve të tij në lagjen “Ortakoll” në Prizren. I njëjti është arrestuar në Suedi nga autoritetet suedeze, në bazë të urdhër arrestit ndërkombëtar të Prokurorisë Themelore në Prizren.

Prokuroria Themelore në Prizren njofton se do t’i ndërmarrë të gjitha veprimet e nevojshme në bazë të Ligjit për Bashkëpunim Ndërkombëtar dhe do të paraqesë kërkesë për ekstradim”.

Vrasja e çiftit që jetonte në Stokholm me shtetësi suedeze ishte bërë lajm në mediat e këtij shteti.

---