Austria do ta mbështesë Kosovën në procesin e liberalizimit të vizave

Ministri Federal i Austrisë për Çështje Evropiane dhe Ndërkombëtare, Michael Linhart në takimin që ka zhvilluar me ministren e Punëve të Jashtme dhe Diasporës së Kosovë, Donika Gërvalla është shprehur se Austria do ta mbështesë Kosovën për heqjen e vizave.

“Temë diskutimi ishte edhe përmbushja e agjendës evropiane e Kosovës, dhe në këtë pikë ministrja Gërvalla mori rikonfirmimin e ministrit Linhart se Austria do ta mbështesë Kosovën në të gjitha proceset, e me theks të veçantë për përmbylljen e procesit të liberalizimit të vizave për qytetarët e Kosovës”, thuhet në njoftimin për media.

Gërvalla, falënderoi ministrin Linhart për përkrahjen e pa rezervë si dhe theksoi rëndësinë që kjo frymë mbështetëse të përcillet edhe tek shtetet skeptike të BE-së që po ndikojnë në zvarritjen e procesit të vizave.

Temë diskutimi ishte edhe angazhimi i Kosovës për forcim të subjektivitetit ndërkombëtar si dhe bashkëpunim rajonal.