Austria feston sot, e hënë, Ditën Kombëtare, në kujtim të vendimit të Parlamentit të 26 tetorit 1955 për neutralitetin e përhershëm të vendit.
Kjo datë u shpall zyrtarisht festë kombëtare në vitin 1965, ndërsa prej vitit 1967 është edhe ditë pushimi në gjithë Austrinë, transmeton albinfo.at.
Para vendosjes së kësaj feste, më 1955, shkollat austriake shënonin “Ditën e Flamurit” më 25 tetor. Një vit më vonë, shënimi i saj u zhvendos më 26 tetor, datë që më pas u përcaktua si Dita Kombëtare.
Me miratimin e neutralitetit, Austria u zotua të ruante pavarësinë dhe paprekshmërinë territoriale, të mos anëtarësohej në aleanca ushtarake dhe të mos lejonte baza ushtarake të huaja në territorin e saj.
Tradicionalisht, festa shoqërohet me ceremoni shtetërore, aktivitete publike dhe prezantime të ushtrisë austriake, veçanërisht në sheshin Heldenplatz në Vjenë. Institucionet shtetërore organizojnë ditë të hapura, ndërsa muze të ndryshëm ofrojnë hyrje falas ose me çmime të reduktuara.
