Shaip Kamberi, prijës i listës “Koalicioni Shqiptar”, ka njoftuar se, sipas rezultateve preliminare, koalicioni ka siguruar dy mandate në Kuvendin e Serbisë dhe mbetet në garë për mandatin e tretë.
Në një postim në Facebook, Kamberi bëri të ditur se koalicioni ka marrë 27.230 vota. Sipas llogaritjes së paraqitur prej tij, me rritjen prej 35 për qind të koeficientëve zgjedhorë për pakicat kombëtare, kjo shifër jep një vlerë llogaritëse prej 36.761 votash, transmeton albinfo.ch.
Kamberi e cilësoi rezultatin si “arritje historike”, duke ia atribuar atë bashkimit të subjekteve politike shqiptare, besimit të qytetarëve dhe angazhimit të përbashkët për përfaqësim dinjitoz.
Si prijës i listës, ai falënderoi qytetarët e Preshevës, Bujanocit dhe Medvegjës për mbështetjen, subjektet politike për bashkimin, si dhe Albin Kurtin për angazhimin e tij.
“Bashkë në zgjedhje, bashkë në përfaqësim, bashkë për të drejtat tona!”, shkroi Kamberi.
Shifrat dhe vlerësimi për mandatet e fituara i referohen njoftimit të Kamberit mbi rezultatet preliminare.
