Austriakët kundërshtojnë hyrjen në BE të Serbisë dhe Kosovës

Sipas një hulumtimi, 51 për qind e austriakëve e kundërshton hyrjen e Serbisë në BE

Më shumë se gjysma e austriakëve kundërshton hyrjen e Serbisë në BE, e qëndrim të ngjashëm austriakët kanë edhe për vendet e tjera të Ballkanit Perëndimor me përjashtim të Kroacisë (54 për qind për e 24 për qind kundër), ka dëshmuar një hulumtim i Shoqërisë austriake për politikë evropiane.

Sipas këtij hulumtimi, 51 për qind e austriakëve e kundërshton hyrjen e Serbisë në BE, ndërsa vetëm 25 për qind e tyre është në favor të hyrjes së saj, raportojnë mediat serbe.

Kundër anëtarësimit të Kosovës në BE janë 56 për qind e austriakëve, ndërsa për anëtarësim janë 21 për qind e tyre.

Kur bëhet fjalë për Maqedoninë, Malin e Zi dhe BeH-në, 46 për qind e austriakëve kundërshtojnë hyrjen ndërsa 25 për qind janë për anëtarësim të këtyre vendeve.

Kundër anëtarësimit të Turqisë në Bashkimin Evropian janë 69 për qind e austriakëve e vetëm 15 për qind e tyre do ta përkrahnin këtë shtet në BE.