Autostrada ndërtohet pa probleme, sipas planit

Për të mundësuar vazhdimin e punimeve, Qeveria e Kosovës ka ndarë nga buxheti i këtij viti, rreth 250 milion euro

　

Punimet rreth ndërtimin e autostradës Vermicë- Merdarë, janë duke shkuar sipas planit të paraparë nga kompania ndërtuese ” Bechtel&Enka”, kanë deklaruar autoritetet kompetente.　

　

Punimet e ndërtimit të kësaj autostrade kanë filluar në fund të maj të vitit të kaluar, dhe që nga atëherë nuk ka pasur ndonjë problem rreth realizimit të këtij projekti, ka bërë të ditur Lah Nitaj, këshilltar i lartë në Ministrinë e Infrastrukturës.　

　Edhe Ela Ruqi, zëdhënëse në kompaninë amerikano- turke ” Bechtel& Enka”, ka theksuar　për radion Evropa e lirë se punimet janë duke shkuar sipas planifikimeve.

　

Sipas saj, 38 kilometrat e para të autostradës do të lëshohen për qarkullim në muajin tetor.　

　

Jo rrallë herë, ky projekt është kritikuar nga përfaqësues të opozitës dhe shoqërisë civile, për koston financiare dhe mënyrën e mbikëqyrjes se ndërtimit të kësaj autostrade.　

　

Sipas tyre, qeveria nuk ka bërë publik çmimin përfundimtar të autostradës, duke krijuar hapësirë të keqpërdoret paraja publike, raporton Evropa e lirë.

　

Por, Lah Nitaj, nga Ministria e Infrastrukturës, ka thënë se qeveria vazhdimisht ka qenë transparente.

　

Për të mundësuar vazhdimin e punimeve, Qeveria e Kosovës ka ndarë nga buxheti i këtij viti, rreth 250 milion euro.　

---