Autostrda Prishtinë- Hani i Elezit ndërtohet me kredi të buta dhe para të buxhetit?

Projektit ideor për ndërtimin e rrugës Prishtinë – Hani i Elezit, që pritet të nisë së realizuari në fund të 2012-s, i është gjetur “ilaçi” financiar.

Ekspertët e Qeverisë së Kosovës kanë ardhur në përfundim se marrja e kredive të buta në pjesën më të madhe, dhe plotësimi i mungesave nga buxheti i Kosovës janë format më të mira të financimit të ndërtimeve në segmentin rrugor që pritet të lidhë dy kryeqytetet, të Kosovës dhe të Maqedonisë.

Ministri i Infrastrukturës, Fehmi Mujota, ka paralajmëruar mënyrën e financimit të këtij projekti nëpërmjet përcaktimeve të Qeverisë.

Mujota nuk ka dhënë asnjë detaj në lidhje me afatin dhe ecurinë e zhvillimit të projektit, por ka thënë se forma e koncesionit nuk është treguar e suksesshme në disa vende të tjera.

Zëdhënësi i Ministrisë së Infrastrukturës, Lah Nitaj, ka theksuar se pas paraqitjes së projektit nga ana e ministrisë te Qeveria, kjo e fundit është në kërkim të gjetjes së mundësive të financimit të njërit prej projekteve kryesore të infrastrukturës që lidh Kosovën me rrugët ndërkombëtare, raporton Koha Ditore.

”Qeveria është duke hulumtuar të gjitha format alternative për financimin e këtij projekti infrastrukturor. Kjo nënkupton kredi të buta dhe gjithashtu mjete nga buxheti”, ka theksuar Nitaj.

Ndërkohë, Qeveria ka pasur hamendësime edhe rreth mënyrës së financimit të autostradës Morin – Merdar, para se projekti të fillonte së realizuari.

Fillimisht ishin kreditë e buta nga disa institucione financiare ndërkombëtare si alternativat kryesore të financimit të këtij projekti infrastrukturor.

Me fillimin e punëve, Qeveria ndërroi mendje, duke vendosur që tërë projektin ta ndërtojë me mjetet nga buxheti.