Babadimri, dhurata për Suelën e sëmurë nga zemra

Kur Carolin Bauer kishte lexuar në gazetë për rastin e dhimbshëm të Suelës, ajo e kishte të qartë se duhej t`i përgatiste diçka të bukur

Suela e vogël i ka shpëtuar vdekjes , siç thuhet, në çastin e fundit. Ajo ishte sjellë urgjentisht nga Kosova në Linz për t`i bërë një ndërhyrje të ndërlikuar kirurgjike në zemër. Vogëlushja e ka kaluar rrezikun por, bashkë me familjen, vazhdon qëndrimin në Gjermani edhe dy vite, deri sa të kë kalojë edhe disa operacione tjera që të shërohet tërësisht.

Që Suela dhe dy motrat e saj pak më të mëdha të mos ndjehen keq në prag të festave të fundvitit, babadimri (Stephan Wrana, mësuesi i gjermanishtes dhe i religjionit në gjimnazin Wilhelm-Diess të Pocking-ut) bashkë me zëdhënësen e shkollës, Carolin Bauer kanë vizituar familjen kosovare në banesën ku jeton.

Ata i kanë befasuar këndshëm tri vajzat me dhuratat e bukura që ua kanë sjellë. Edhe Suela e vogël është kënaqur me vizitën, ndonëse nuk ka mundur ta kuptojë qëllimin.

Kur Carolin Bauer kishte lexuar në gazetë për rastin e dhimbshëm të Suelës, ajo tashmë e kishte fare të qartë se foshnjës dhe dy motrave të saj duhej t`u përgatiste diçka të bukur, shkruan Neue passauer nachrichten. Nga projektet humanitare që kanë zhvilluar në vende të ndryshme të botës, grupit të humanistëve të gjimnazit u kishte mbetur mënjanë edhe një shumë të hollash. Kështu, bashkë me nxënësit tjerë dhe me mësuesin Wrana, ato kanë blerë dhurata si lodra të ndryshme, kukulla dhe ëmbëlsira për të kënaqur tri motrat e vogla.

Meqë qëndrimi i familjes në Gjermani po vazhdon, babai, Bajrami tashmë ka mësuar gjermanishten dhe ka filluar kursin për të marrë lejen e vozitjes. Ndërsa dy motrat e mëdha tashmë kanë filluar të ndjekin mësimin parashkollor.