Bahtiri Presidentit: “Mos na detyroni të shkojmë tutje”

Kryetari i Mitrovicës Jugore, Agim Bahtiri, ka dorëzuar peticionin për bashkimin e Mitrovicës te presidenti Hashim Thaçi.

Bahtiri, pas takimit që ka pasur me presidentin, ka thënë se ka kërkuar nga presidenti që ta marrë iniciativën që sa me shpejt ta dorëzojë peticionin në Kuvend për shqyrtim.

“Po presim që vendimi të jetë sa më i shpejtë, pasi ne qytetarët e Mitrovicës jemi të zhgënjyer që deri tash nuk është proceduar në Kuvend. Ju e dini që Mitrovica është ndarë padrejtësisht dhe kërkojmë që Mitriovica të bashkohet, pasi ajo veriorja është duke u udhëhequr nga organet paralele. Mjaft më me këto përplasje brenda institucioneve, le të mendojmë për të mirën e qytetarëve. Po ia bëj me dije kryeministrit dhe MAPL-së se Mitrovica është e bashkuar dhe kjo sa më shpejt që është e mundur të shfuqizohet vendimi. Se a e përkrah kush a jo, është pak e rëndësishme. Me përjashtim të kryeministrit, të gjithë liderët e përkrahin këtë ide. Mos na detyroni të shkojmë më tutje”, ka thënë Bahtiri.