Banesat e reja shumë më të shtrenjta në Zvicër, në Cyrih çmimi arrin gati 20 mijë franga për metër katror

Të dhënat e kompanisë së pasurive të paluajtshme Lookmove, të cilat i referohen vitit 2025, krahasojnë çmimin mesatar për metër katror të banesave të reja me atë të banesave ekzistuese

Blerja e një banese të re në Zvicër mund të kushtojë dukshëm më shumë sesa blerja e një banese ekzistuese. Një analizë e çmimeve në 102 qytete zvicerane tregon se diferencat në disa zona janë veçanërisht të mëdha.

Të dhënat e kompanisë së pasurive të paluajtshme Lookmove, të cilat i referohen vitit 2025, krahasojnë çmimin mesatar për metër katror të banesave të reja me atë të banesave ekzistuese.

Diferenca më e madhe është regjistruar në Brig, në kantonin Valais. Atje, çmimi për një banesë ekzistuese është rreth 5,446 franga për metër katror, ndërsa për një banesë të re arrin pothuajse 9,500 franga. Kjo përfaqëson një diferencë prej rreth 74 për qind.

Diferenca të mëdha janë regjistruar gjithashtu në Arlesheim të Basel-Landschaft dhe Kriens të Lucernit, ku banesat e reja kushtojnë përkatësisht rreth 70 dhe 55 për qind më shumë, shkruan Watson.ch, transmeton albinfo.ch.

Situata është disi ndryshe në qytetet më të mëdha të Zvicrës. Edhe pse çmimet absolute janë shumë më të larta, diferenca mes banesave të reja dhe atyre ekzistuese është më e vogël.

Në Lozanë, banesat e reja kushtojnë rreth 5.7 për qind më shumë, në Gjenevë 9.1 për qind dhe në Cyrih rreth 10.9 për qind më shumë.

Megjithatë, Cyrihu mbetet jashtëzakonisht i shtrenjtë. Çmimi mesatar për një banesë të re atje arrin pothuajse 20 mijë franga për metër katror. Për krahasim, në Altstätten të kantonit St. Gallen çmimi është rreth 6,813 franga për metër katror.

Por ka edhe përjashtime interesante. Në Chur, Zermatt dhe Delémont, banesat e reja rezultojnë nga 3 deri në 15 për qind më të lira se ato ekzistuese.

Sipas Lookmove, këto dallime mund të shpjegohen nga faktorë të ndryshëm, përfshirë sipërfaqen, cilësinë dhe lokacionin e pronave. Banesat ekzistuese mund të ndodhen në zona më të favorshme ose të jenë rinovuar, duke e rritur kështu vlerën e tyre. Ndërkohë, projektet e reja mund të ndërtohen në zona më periferike, ku ka ende tokë të disponueshme.

Analiza tregon gjithashtu sa të rralla janë banesat e reja në tregun zviceran. Nga rreth 180 komuna që klasifikohen si qytete nga autoritetet federale, në analizë janë përfshirë vetëm 102, pasi kriter ishte që gjatë vitit 2025 të ishin ofruar për shitje të paktën dhjetë banesa të reja.

---