Banka Botërore: Shqipëria po plaket

Një raport i Bankës Botërore thotë se Shqipëria është një nga vendet me rënien më të shpejtë të lindshmërisë në Evropë.

Në raportin e titulluar “Plakja e artë” thuhet se në vitin 1970 në Shqipëri lindnin mesatarisht 5 fëmijë për një grua. Por, në vitin 2012 shifra zbriti poshtë normës së zëvendësimit të popullsisë, që është nën 2 fëmijë për grua. Sipas Bankës Botërore, kjo është një rënie dramatike, raportojnë mediat në Tiranë, përcjell albinfo.ch.

Siç raporton Top Channel, në Francë u deshën dy shekuj që lindshmëria të binte nga 5 fëmijë për një grua, nën normën e zëvendësimit të popullsisë. Në Shqipëri kjo ndodhi vetëm për 34 vjet.

Sipas Bankës Botërore, kjo është rënia e tretë më e shpejtë e lindshmërisë që është regjistruar ndonjëherë në historinë botërore, pas Republikës së Koresë dhe Rusisë.
„Bashkë me emigrimin masiv, ulja e lindshmërisë po shkakton plakjen e shpejtë të popullsisë në Shqipëri“, thuhet në raport.

Të dhënat zyrtare tregojnë se në vitin 2012 mosha mesatare e popullsisë në Shqipëri ishte 35.7 vjet. Por sipas BB-së, në vitin 2016 “shqiptari mesatar” do të jetë 47.5 vjeç.