Banorët e Bernës tani mund të raportojnë krimin kibernetik në internet

(KEYSTONE/Christian Beutler)

Nga 22 janari disa krime kibernetike mund të raportohen online në kantonin e Bernës. Deri më tani në internet mund të raportoheshin vetëm vjedhjet e biçikletave, dëmtimi i pronës dhe humbja e targave, shkruan albinfo.ch.

Në vend që të shkoni në një stacion policie si më parë, raportimi i krimeve kibernetike është i mundur gjatë gjithë kohës dhe pavarësisht vendndodhjes, raporton Blick.

Sipas njoftimit nga policia kantonale e Bernës, në platformën Suisse ePolice mund të raportohen shkeljet e mëposhtme: mallra të padorëzuara nga porositë e bëra nëpërmjet platformave të reklamave të klasifikuara, dyqane mashtruese në internet, keqpërdorim i identitetit të dikujt tjetër dhe reklama false të pasurive të paluajtshme.

Sipas komunikatës, platforma funksionon që nga viti 2013. Ndër të tjera tashmë online janë raportuar vjedhjet e biçikletave dhe dëmtimi i pronës si dhe humbja e targave. Është ende e mundur të bëni një denoncim në stacionet e policisë në rajonin ku jetoni.