Barrikadat të hiqen me konsultime?

Barrikadat në veri të Kosovës do të mbesin aty të paktën deri sa në Kosovë të kthehen dy liderët e vendit, presidentja Atifete Jahjaga dhe kryeministri Hashim Thaçi, shkruan Koha Ditore.

Burime të gazetës kanë shpjeguar se EULEX-i dhe KFOR-i në konsultim me institucionet e Kosovës kanë vlerësuar se nuk do të bëhet asnjë përpjekje apo aksion për heqjen e barrikadave në kohën derisa delegacioni i lartë kosovar po zhvillon takime në kuadër të sesionit të OKB-së në Neë York.

KFOR-i e EULEX-i nuk e shohin çështjen e heqjes së barrikadave vetëm si aksion të organeve të sigurisë.

Këta mekanizma ndërkombëtarë presin që përfaqësuesit politikë të Kosovës dhe të Serbisë të konsultohen me Brukselin për mënyrën se si do të mundësohet qarkullimi i qytetarëve në pjesën më problematike të Kosovës.

Strukturat paralele të Serbisë në veri të Kosovës kanë bllokuar rrugët në pjesën që dominohet nga qytetarët serbë të Kosovës nëpërmjet barrikadave të ndryshme përfshirë muret e betonit, si përgjigje ndaj veprimit të EULEX-it dhe KFOR-it të koordinuar me institucionet e Kosovës  për vendosjen e doganierëve në pikëkalimet kufitare në Jarinje dhe Bërnjak.

Zëdhënësi i KFOR-it, Ralph Adametz, ka thënë se misioni paqeruajtës i NATO-s nuk ka dhënë kurrfarë ultimatumi për heqjen e barrikadave.

Ai e ka konfirmuar se misioni i NATO-së pret që të ketë konsultime politike për heqjen e barrikadave.