Basha: Largimi i Ramës i domosdoshëm

Kryetari i Partisë Demokratike të Shqipërisëë, Lulzim Basha e quajti të domosdoshëm largimin e Kryeministrit Ramës nga pushteti për siç tha ai, ta ndalur fundosjen e Shqipërisë.

“Duhet një brez i ri politik dhe një elitë e re për vendin”, deklaroi Basha, gjatë mbledhjes së Kuvendit Kombëtar të PD-së.

Partia Demokratike zhvillon  zgjedhjet për 265 anëtarë të Këshillit Kombëtar, ndërkohë që deri më tani, nga 350 kandidatë kanë mbetur vetëm 347, pas tërheqjes nga gara të tre prej tyre.

Në fjalën e mbajtur në këtë takim, Basha mbështeti fillimisht qytetarët që protestojnë, si ata që protestojnë kundër ndërtimit të Teatrit, studentët dhe banorët e Astirit.

Rinia studentore, tha Basha, ka flakur inercinë e mosveprimit e heshtjes duke na dhënë shembull, transmeton albinfo.ch.

“Dua të jem i qartë pa asnjë mëdyshje. Edi Rama e ka shtyrë Shqipërinë në buzë të greminës. Pas Enver Hoxhës ai është njeriu më i dëmshëm që ka pasur ndonjëherë Shqipëria. Largimi i tij nga pushteti është i domosdoshëm për të ndalur fundosjen e Shqipërisë. Largimi i tij nga pushteti është hapi i parë drejt ndryshimit të drejtimit të vendit”, thekoi Basha.