Bashkatdhetarët nga Gjermania ndihmojnë personat me aftësi të kufizuara në Kosovë

Elevate @elevatebeer

Tashmë dihet se bashkatdhetarët që jetojnë dhe punojnë në shtete të ndryshme të Evropës, të organizuar nëpër klube apo shoqata, mundohen që në mënyra të ndryshme të ndihmojnë vendlindjen e tyre, transmeton albinfo.ch.

Tash e sa vjet një përkrahje të tillë vjen nga shoqata humanitare «Dardania» me seli në Wesbaden të Gjermanisë.

Duhet theksuar se kjo shoqatë, edhe këtyre ditëve të pandemisë, është përkujdesur që sado pak të ndihmon njerëzit në nevojë, e në veçanti ata me aftësi të kufizuara.

Këtë e konfirmon edhe kryetari i Shoqatës, Hajdar Nitaj, përmes komunikimit elektronik, sipas të cilit «Dardania» e themeluar në vitin 1997, ka ndihmuar dhe do të vazhdojë të ndihmojë njerëzit në nevojë, qoftë në mënyrë direkte apo edhe përmes shoqatave dhe institucioneve shtetërore të Republikës së Kosovës.

Kjo shoqatë ka bërë publike listën e përkrahjes së bërë këto ditë, me karroca për personat apo shoqatat në Kosovë. Në listën e dërguar nga «Dardania» e Wesbadenit, shihet se shtrirja e përkrahjes së saj është në tërë territorin e Kosovës.

“Ata që ndihmojnë dhe meritojnë lëvdatat, janë anëtarët e shoqatës, ata të cilët nuk kursejnë xhepat e tyre, për të ndihmuar njerëzit në nevojë”, ka nënvizuar Nitaj, duke u shprehur optimist se nuk do të ndalojnë së vepruari për interesin e Kosovës, për interesin e popullit shqiptar. /Albinfo.ch