BE dhuron 67.5 milionë euro për Kosovën

pixabay

Bëhet e ditur se Bashkimi Evropian ia ka dhuruar Kosovës sot 67.5 milionë euro në kuadër të mbështetjes për energji elektrike, përcjell albinfo.ch.

Referuar zyrës së kryeministrit, kjo mbështetje është realizuar brenda programit vjetor IPA 2023. Projekt që kap vlerën e 75 milionë eurove, përcjell arbresh.info.

“Komisioni Evropian kreu disbursimin e mjeteve financiare në vlerën prej 67.5 milionë eurove. Kjo është pagesa e transhit të parë të përkrahjes buxhetore në kuadër të programit vjetor IPA 2023, që në total kap vlerën prej 75 milionë eurove”, thuhet në komunikatë.

Pas kësaj mbështetjeje, Qeveria e Kosovës do të fillojë zbatimin e këtyre masave:

– mbështetje e drejtpërdrejtë financiare për familjet më të cenueshme dhe më të pafavorizuara;

– stimulimi i kursimeve të energjisë nga konsumatorët familjarë;

– mbështetja e konsumatorëve individualë familjarë duke përfshirë konsumatorët e cenueshëm përmes rritjes së efiçiencës energjetike të njësive të banimit dhe ndërtesave;

– mbështetja e konsumatorëve shtëpiak duke përfshirë konsumatorët e cenueshëm në investimin në pajisje shtëpiake me efiçiencë energjetike dhe sisteme të energjisë së ripërtërishme;

– stimulimi i kursimeve të energjisë nga ndërmarrjet mikro, të vogla dhe të mesme”.

Ky është kësti i parë i parave që Kosova i merr nga pakoja e BE-së për mbështetjen për energji për Ballkanin Perëndimor. Pakoja është krijuar nga BE-ja dhe shtetet anëtare të saj për t’i ndihmuar rajonit që ta kapërcejë krizën energjetike dhe rritjen e madhe të çmimeve të energjisë që i ka shkaktuar agresioni i pajustifikuar i Rusisë ndaj Ukrainës.