BE-ja mbetet pa përfaqësuesin special në Kosovë

Skadon mandati përfaqësuesit special të BE-së në Kosovë, Piter Feith, ndërsa BE-ja nuk ka caktuar pasardhësin e diplomatit holandez

Bashkimi Evropian nuk ka caktuar asnjë pasardhës për ish-përfaqësuesin special të tij në Kosovë, Piter Feith, mandati i të cilit skadoi të shtunën.

Zyrtarët e institucioneve kosovare preferojnë që në kuadër të ristrukturimit të shërbimit të jashtëm evropian, për Kosovën të caktohet një përfaqësues i vetëm i BE-së, raporton Evropa e Lire.Autoritetet kosovare presin që Brukseli zyrtar të marrë sa më parë një vendim për ristrukturimin e pranisë së tij në Kosovë, bazuar në Traktatin e Lisbonës për të tejkaluar, siç thuhet, vakuumin evropian në vend.

Përveç kësaj, BE-ja nuk ka caktuar një shef të ri të Zyrës Ndërlidhëse të Komisionit Evropian në Prishtinë, funksionin e të cilit deri para pak muajsh e luajti italiani Renzo Daviddi.

Përfaqësuesit e institucioneve kosovare shfaqin shpresën që vendimi i 27 shteteve anëtare të BE-së ta nxjerrë një përfaqësues të vetëm evropian në Kosovë, në mandatin e të cilit do të shkriheshin roli i deritashëm i Feithit dhe ai i Davidit.

Sekretari i përgjithshëm i Ministrisë për Integrime Evropiane, Edon Cana, i tha Radios Evropa e Lirë se me një përfaqësues të vetëm të BE-së në Kosovë do të lehtësohej komunikimi dhe koordinimi ndërmjet Prishtinës dhe Brukselit.

Emrat e diplomatëve të ndryshëm evropianë si ai i austriakut Stefan Lehne, sllovakut Mirosllav Lajcak, italianit Fernando Gentilini dhe së fundi ai i përfaqësueses së Parlamentit Evropian, Ulrike Lunacek, janë përfolur deri më tani si zëvendësues potencial të Piter Feithit në cilësinë e përfaqësuesit special të BE-së në Kosovë.